 |
| फाइल तस्बिर् / लेखक |
गजल
- प्रयास भट्टराई
किन्न त कोही साइकल कोही कार किन्छन्
मेरो देशका जनता पूरै सरकार किन्छन् ।
मोफसलबाट खाली खुट्टा राजधानी पुग्छन्
ओहो ! त्यहाँ पुगेपछि ठूलो दरबार किन्छन् ।
तारे होटेलमा भोकमरी निवारण-भाषण छ
निर्धन बिचरा दुई छाक टार्न अचार किन्छन् ।
भनसुनमा छ जिन्दगी, मनसुनमा छ नियति
पद प्रतिष्ठा पहुँच पैसाले पुरस्कार किन्छन् ।
लसुन छैन प्याज छैन निर्धन बस्तीतिर
सक्नेले पो सुन किन्छन् महँगो बजार किन्छन् ।
रक्सीमा रम्ने जँड्याहा रक्सीमै रम्छ
हरेक मान्छेले आफ्नै अनुकूल संसार किन्छन् ।
पैसाको दुनियाँ हो, पैसै संसार हो साथी
नपत्याए हेर पैसाले नमस्कार किन्छन् ।
चामल बेच्ने चुपचाप छ पीठो बेच्नेले पो
सांसद,शक्ति, सत्ता भत्ता अनि भन्सार किन्छन् ।
अल्छी स्वाँठले डोकोमा दूध दुहिरहन्छन्
अथक प्रयास गर्नेले बलियो निधार किन्छन् ।
#कला #नेपाली साहित्य #गजल
